Përparim Rama mbron kontratën “Smart”: Çmimi 8,50 euro për metër shirit përfshin edhe garancinë 10-vjeçare

Kryetari i Prishtinës, Përparim Rama, i është kundërpërgjigjur të premten deputetit të Lëvizjes Vetëvendosje, Ilir Kërçeli, lidhur me kontratën rreth 10 milionë euro për ndriçimin publik “Smart” në kryeqytet. Siç njofton RTK-ja, Rama i ka cilësuar pretendimet e Kërçelit si përpjekje për manipulim të opinionit publik dhe show politik.

Në qendër të reagimit është çmimi i shiritit sinjalizues. Sipas Ramës, çmimi prej 8,50 eurosh për metër nuk është vetëm kostoja e materialit: ai përfshin furnizimin me material, transportin, angazhimin dhe punën e punëtorëve, vendosjen e shiritit në kanalin përkatës, garancinë 10-vjeçare, mirëmbajtjen pa kosto shtesë dhe TVSH-në. “Me i paraqitë krejt këto shërbime vetëm si çmim të një ‘shiriti’ është veprim i ulët”, ka deklaruar Rama, siç raporton RTK-ja.

Rama ka thënë se procedura e prokurimit është shqyrtuar nga Organi Shqyrtues i Prokurimit (OSHP), Komisioni Rregullativ i Prokurimit Publik (KRPP), auditorët e brendshëm dhe të jashtëm, si dhe nga hetuesia. “Nëse Ilir Kërçeli mendon që është më i dijshëm se të gjitha këto institucione dhe organe kompetente, le t’na kallxon”, ka thënë ai. Kryetari i kryeqytetit ka paralajmëruar gjithashtu se do të ndjekë rrugën ligjore ndaj deklaratave që i konsideron shpifje.

Siç raporton VOX Kosova, e cila e ka ndjekur këtë tender, ky është reagimi i parë i Ramës për vetë kontratën e vitit 2025; në reagimin e tij, ai nuk është ndalur te pozicionet e tjera, për të cilat VOX ka raportuar se janë shtrenjtuar për qindra e mijëra herë krahasuar me kontratën e vitit 2024, në disa raste nga 1,20 euro në 2.300 euro.

Nga ana e tij, Kërçeli kishte publikuar një fotografi të shiritit, duke pretenduar se ai ishte faturuar shumë më shtrenjtë sesa vlera e tij reale dhe se herë kishte kushtuar 19 e herë 8,50 euro për metër. Qendra e Vetëvendosjes në Prishtinë i ka dorëzuar materialet për këtë kontratë në Prokurorinë Speciale, duke pretenduar se me të është dëmtuar buxheti i Komunës së Prishtinës — zhvillim për të cilin 24-ore.com ka raportuar më 3 nëntor.