Galliani përdor “Calciopoli” dhe kunja ndaj Interit: Italia është i vetmi vend ku i treti bëhet i pari…

Adriano Galliani riktheu debatin për “Calciopolin” dhe lëshoi një “thumb” drejt Interit. Gjatë një paneli me Fabio Capello në Solomeo, në prezantimin e listës së 100 kandidatëve për çmimin “European Golden Boy”, Galliani deklaroi: “Italia është i vetmi rast në botë ku i treti bëhet i pari. Në qiell, të fundit bëhen të parët, ndërsa në tokë të tretët bëhen të parët. Capello kishte fituar dy tituj në fushë me Juventusin”.

Më pas, ish-administratori i deleguar i Milanit dhe Monza foli për krizën e futbollit italian: “Kanë ndryshuar të ardhurat. Klubet që kanë fituar Champions League vitet e fundit kanë të gjitha dyfishin e të ardhurave të klubeve të mëdha italiane. Për t’i rritur të ardhurat kemi nevojë për stadiume dhe infrastrukturë sportive. Një stadium i bukur ndihmon edhe në shitjen e të drejtave televizive”.

Galliani shtoi se Serie A dikur ishte “kampionat ku lojtarët vinin me qejf”, ndërsa sot është “kampionat tranziti”. Ai e mbylli me një tjetër reflektim: “Pse fitonim më parë? Sepse kishim lojtarët më të mirë. I fundit që fitoi ‘Topin e Artë’ duke luajtur në Itali ishte Kaká në vitin 2007”.