Gazetarinnë shtatë role dhe një shfaqje
Gazetari- reporter
Deputët e opozitës vijuan protestën me flakadanë dhe karrike në Parlament, ndërkohë që shumica parlamentare brenda 7 minutash miratoi 7 miliardë buxhet për vitin 2024. Opozita bën thirrje se do të vijojë përpjekjet për të pamundësuar punën në Parlament duke pretenduar se po i mohohet e drejta kushtetuese për ngritjen e komisioneve hetimore.
Gazetari – prokuror
Opozita edhe këtë herë ia arriti të krijojë kaos në Parlament, sepse edhe sot garda dështoi të vendosë situatën nën kontroll. Flakadanët, plasëset dhe çakmakët janë prova të pakundërshtueshme që vërtetojnë thyerjen e të paktën 4 neneve të Kodit Penal si: Prishjen e rendit dhe të qetësisë publike, shkatërrimin e pronës publike, perdorimin e materialeve piroteknike dhe pengimin e ushtrimit të detyrës. Kush ka sy dhe veshë e kupton, kush ka mendje gjykon, kush ka ligj në dorë vepron. Përderisa përjashtimi me 10 ditë i deputetëve zjarrëvënës nuk funksionon, nuk kuptohet pse shumica nuk ndryshon rregulloren dhe t’i përjashtojë për një vit, dy apo 1 mandat.
Gazetari – avokat i qeverisë
Demek-opozita e flakadanëve, “non gratave” dhe zullumqarëve ka humbur busullën e arsyes. E ndarë në 4 apo 5 pjesë, arriti të ndezë sot Kuvendin duke dhuruar shfaqjen më të shëmtuar për botën në një kohë kur ky vend çdo ditë lartëson imazhin e tij ndërkombëtar. Megjithatë demek-opozita nuk e ndali dot shumicën të miratojë buxhetin më të madh që ka patur ndonjëherë vendi. Duket se pakica me apo pa dashje me veprimet e saj po i vjen në ndihmë shumicës. S’dua të mbaj anë, por e vërteta është e vërtetë. Sa për qeverisjen Rama nuk duhet t’i fshehim kritikat, mendoj se duhet të bëjë akoma edhe më shumë.
Gazetari- gjykatës
Parlamenti duhet të funksionojë normalisht dhe prishësit e rendit dhe qetësisë do të ndëshkohen jo vetëm sipas ligjeve në fuqi. Nëse mosmarrëveshjet mes palëve nuk zgjidhen në rrugë politike, dera e gjykatës është e hapur për të gjithë. Le të shkojnë në gjykatë.
Gazetari – analist
Kur përplasen dy vezë, njëra do të thyhet. Nga kjo betejë janë të humbur të dy palet. Opozita është e humbur, por edhe shumica humbet sepse nuk ka interes të ketë një Parlament me shumë tym e pak flakë. Le të presim përplasjen dhe këtu jemi dhe do të flasim për pasojat.
Gazetari – diplomat
Palët duhet të gjejnë gjuhën e dialogut për të shmangur konfliktin e panevojshëm dhe të punojnë në interes të publikut dhe përmirësimit të imazhit të Shqipërisë
Gazetari fallxhor
Situata do të bëhet më keq para se të bëhet edhe më keq. SPAK do të bëj atë që sot pak kush e mendon. Prisni dhe do të shihni çudira. Ata që sot hiqen si tigra do të kthehen në mace dhe nga ato mace që i temb edhe miu.
Shënim: Rolet ndahen sipas temës.
