Gërmime arkeologjike në Elbasan, mozaikët e zbuluar i përkasin një faze më të hershme të bazilikës paleokristiane

Gërmimet arkeologjike në kuadër të projektit kërkimor “Lagja romake-bizantine jashtë mureve të Castrum Scampis – Bazilika paleokristiane extra muros”, të zhvilluara nga Instituti i Arkeologjisë i Akademisë së Shkencave në zonën e Scampis, kanë sjellë një zbulim të rëndësishëm: mozaikë të panjohur më parë, që i përkasin një faze më të hershme të bazilikës paleokristiane jashtë mureve të qytetit antik.

Blendi Gonxhja ministër i Turizmit, Kulturës dhe Sportit thotë se mes tyre spikat një mozaik polikrom me skenën e Eukaristisë, i ruajtur në gjendje shumë të mirë, si edhe një mbishkrim ku përmenden dy dhurues, ndër ta diakonesha Euridyce. “Projekti është miratuar nga Këshilli Kombëtar i Trashëgimisë Kulturore Materiale (KKTKM) dhe, në vijim të këtyre zbulimeve që pasurojnë njohuritë mbi historinë e Elbasanit dhe trashëgiminë e tij kulturore, Instituti Kombëtar i Trashëgimisë Kulturore, në bashkëpunim me Bashkinë Elbasan, po përgatit projektin për rehabilitimin e zonës përreth monumentit, si dhe për restaurimin dhe konservimin e tij, me synim mbrojtjen, valorizimin dhe kthimin e kësaj pasurie në një destinacion të aksesueshëm për publikun dhe vizitorët”, shprehet ministri Blendi Gonxhja në reagimin e tij në rrjete sociale.

Në Elbasan prej disa ditësh ka filluar sezoni i gërmimeve arkeologjike të vitit 2026, në kuadër të projektit kërkimor arkeologjik të Institutit të Arkeologjisë, ku më herët bëri me dije se që në javën e parë të punës po evidentohen elementë shtesë shumë të vlefshëm për të kuptuar më mirë evolucionin e objektit përgjatë shekujve V-VI dhe më gjerë dinamikat e zhvillimit, ekonomik, kulturor dhe shoqëror, të Scampis (Elbasan) përgjatë këtyre shekujve.