Gjatë fundjavës në Mal të Zi u arrestuan 81 shoferë, në 49 aksidente humbën jetën dy persona

Gjatë fundjavës, nga 23 deri më 25 tetor, në rrugët e Malit të Zi u regjistruan 49 aksidente trafiku, në të cilat humbën jetën dy persona, siç njofton CdM, duke cituar Drejtorinë e Policisë.

Në këto aksidente u lënduan rëndë 9 persona, ndërsa 20 të tjerë pësuan lëndime të lehta.

Zyrtarët e policisë së trafikut sanksionuan 1.691 shoferë për shkelje të Ligjit për sigurinë e trafikut rrugor. Gjatë kontrolleve u paraqitën 205 kallëzime për kundërvajtje dhe u lëshuan 1.486 urdhërpagesa për kundërvajtje, ndërsa u sekuestruan përkohësisht 17 palë targa.

Gjithsej 81 shoferë u privuan nga liria. Prej tyre, 46 u arrestuan për drejtim të mjetit nën ndikimin e alkoolit, në përqendrim mbi 1 g/kg, ose për refuzim të alkotestit, 10 për drejtim nën ndikimin e drogave ose substancave të tjera psikoaktive apo për refuzim të testimit, dhe 25 për shkelje të tjera më të rënda.

Më së shumti shoferë u arrestuan në Podgoricë, gjithsej 33, pastaj në Tivar (Bar) 10 dhe në Nikshiq 9, sipas të njëjtit njoftim të policisë.