Gjenden 934 monedha argjendi romake në Gjermani

Një arkeolog amator i cili zbuloi disa monedha argjendi romake në një fushë në Gjermaninë perëndimore , kuptoi se kishte hasur në diçka shumë më të madhe kur detektori i tij i metaleve vazhdonte të binte.

Oliver Riedl kërkoi ndihmë nga autoritetet dhe një grup ekspertësh që filluan gërmimet zbuluan menjëherë një total prej 934 denarësh argjendi romakë.

“Është thesari më i madh i monedhave të gjetura ndonjëherë në Gjermani nga koha e perandorit romak Hadrian”, tha të martën zyra lokale përgjegjëse për monumentet arkeologjike.

“Ishte e qartë për mua se diçka më e madhe ishte varrosur këtu”, tha Riedl, duke përshkruar se si detektori i tij i metaleve vazhdoi të sinjalizonte edhe pasi kishte gjetur disa monedha pranë Wesseling, në jug të Këlnit.

Thesari i monedhave, i cili peshon 3.1 kg, u ekspozua në LVR-LandesMuseum Bonn të martën. Koleksioni ndoshta është varrosur qëllimisht në çerekun e dytë të shekullit të dytë pas Krishtit, sipas Zyrës së LVR-së për Ruajtjen e Monumenteve Arkeologjike në Rheinland.

“Sigurisht, ne mund të spekulojmë vetëm për motivet, por ka shumë të ngjarë që dikush të ketë dashur t’i mbajë këto para të sigurta. Në fund të fundit, bankat nuk ekzistonin atëherë”, tha Erich Classen, një arkeolog shtetëror dhe drejtor i zyrës.