Gjendet mjet shpërthyes në Prizren, intervenon njësiti i deminimit të FSK-së
Mjeti i dyshuar u gjet në rrugën "Destan Billusha"; policia siguroi vendin e ngjarjes dhe FSK-ja e tërhoqi atë në mënyrë të sigurt.
Një mjet i dyshuar shpërthyes është gjetur të dielën në rrugën “Destan Billusha” në Prizren, duke vënë në lëvizje njësitet policore dhe Forcën e Sigurisë së Kosovës.
Sipas njoftimit të Policisë së Kosovës, rasti është raportuar rreth orës 15:00. Njësitet policore kanë dalë menjëherë në vendin e ngjarjes dhe kanë siguruar perimetrin për të shmangur çdo rrezik për qytetarët.
Pas vlerësimit të situatës, në terren ka intervenuar njësiti i specializuar për deminim i Forcës së Sigurisë së Kosovës, i cili ka tërhequr në mënyrë të sigurt mjetin e dyshuar.
Policia ka bërë të ditur se nuk ka raportime për të lënduar dhe se po vazhdon punën për zbardhjen e plotë të rrethanave të rastit.
Fotoja është ilustruese (arkiv).
Burimi: KosovaPress
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.