Gjermania paraqet planet për të forcuar mbrojtjen ndaj sulmeve kibernetike

Gjermania njoftoi të martën planet për të zhvilluar “mbrojtje aktive kibernetike” përballë rritjes së sulmeve online, shumë prej të cilave janë bërë më të sofistikuara përmes përdorimit të inteligjencës artificiale.

Ministri i Brendshëm gjerman, Alexander Dobrindt, deklaroi se qeveria do të miratojë këtë muaj një ligj të ri që do t’u lejojë shërbimeve të sigurisë të kundërpërgjigjen ndaj serverëve të përdorur për sulme kibernetike.

Sipas tij, synimi është “prishja dhe shkatërrimi i infrastrukturës së sulmuesve”, duke theksuar se shumë prej sulmeve kanë origjinë nga Rusia.

Dobrindt tha se autoritetet synojnë të pengojnë përdorimin e serverëve dhe sistemeve që shfrytëzohen për sulme ndaj kompanive energjetike, institucioneve shtetërore dhe infrastrukturës kritike në Gjermani.

Ministria e Brendshme gjermane bëri të ditur se krimi kibernetik ka shkaktuar mbi 200 miliardë euro dëme ekonomike gjatë vitit të kaluar, ndërsa mjetet e bazuara në inteligjencën artificiale po përdoren gjithnjë e më shumë për të kryer sulme më të shpejta dhe më profesionale.

Sipas të dhënave zyrtare, gjatë vitit 2025 në Gjermani u regjistruan rreth 334 mijë raste të krimit kibernetik, ku dy të tretat e tyre dyshohet se kanë ardhur nga jashtë vendit ose nga burime të paidentifikuara.