Gjilani përforcon sulmin me transferimin e Ade Oguns
Sulmuesi 25-vjeçar Ade Oguns ka nënshkruar me Gjilanin deri në verën e vitit 2028 dhe do të jetë në dispozicion që nga ndeshja e ardhshme kampionale kundër Ballkanit.
Gjilani ka zyrtarizuar përforcimin e radhës në repartin ofensiv, siç njofton Telegrafi, duke siguruar shërbimet e sulmuesit Ade Oguns. Sulmuesi 25-vjeçar ka nënshkruar kontratë me klubin kuqebardhë, e cila e mban atë pjesë të skuadrës së Gjilanit deri në verën e vitit 2028.
Oguns pritet të jetë një alternativë shtesë për trajnerin në fazën sulmuese, duke rritur konkurrencën brenda repartit dhe duke i dhënë stafit teknik më shumë mundësi zgjedhjeje në ndeshjet e ardhshme të kampionatit.
Sulmuesi vjen me përvojë ndërkombëtare, pasi gjatë karrierës së tij ka qenë pjesë e Caracas FC në Venezuelë, e Wydad AC në Marok dhe e KAS Eupen në Belgjikë. Ai nuk është i panjohur as me futbollin kosovar, pasi më parë ka luajtur edhe për Ferizajn.
Sipas klubit, të gjitha procedurat e regjistrimit të lojtarit tashmë janë përfunduar. Oguns do të jetë në dispozicion të stafit teknik që nga ndeshja e ardhshme kampionale, ajo kundër Ballkanit, ku pritet të japë kontributin e tij të parë me fanellën kuqebardhë.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.