Gjykata e apelit refuzon të pezullojë sanksionet ndaj avokatëve të Trump në çështjen me IRS-në

Një gjykatë amerikane e apelit refuzoi të martën, më 29 shtator, të bllokonte menjëherë sanksionet e vendosura ndaj avokatëve të presidentit Donald Trump, të cilët një gjykatëse federale akuzoi se e keqpërdorën sistemin gjyqësor duke ndërmjetësuar një “marrëveshje” në padinë e Trump kundër Shërbimit të të Ardhurave të Brendshme (IRS), siç raporton Reuters.

Në sfond të vendimit është padia prej 10 miliardë dollarësh që Trump, anëtarë të familjes së tij — Donald Trump Jr. dhe Eric Trump — si dhe Trump Organization ngritën kundër IRS-së për zbulimin e informacioneve tatimore të presidentit.

Gjykatësja federale e Floridës Kathleen Williams, e Qarkut Jugor të Floridës, e quajti padinë “collusive” (bashkëpunuese), me “asnjë bazë të vlefshme në ligj apo fakt”, një “sham” (farsë), dhe vendosi sanksione jo-monetare ndaj avokatëve: e referoi avokatin Alejandro Brito te Florida Bar për disiplinë të mundshme; ia ndaloi ish-avokatit të Shtëpisë së Bardhë Daniel Epstein kërkesën për pranim në praktikë në Qarkun Jugor të Floridës për një vit; lejoi 35 ish-gjykatës federalë dhe ish-zyrtarë të IRS-së e Thesarit (amici curiae) të kërkojnë rimbursim të shpenzimeve ligjore nga Trump; dhe u ndaloi palëve të citojnë të ashtuquajturën “marrëveshje zgjidhjeje” si provë zgjidhjeje në ndonjë procedurë zyrtare. Sipas raportimeve, marrëveshja do ta mbronte Trumpin dhe familjen nga hetimet e kaluara tatimore dhe do të drejtonte një fond “anti-weaponization” prej 1.776 miliardë dollarësh.

Williams kishte refuzuar të pezullonte sanksionet edhe rreth dy javë më parë, me një urdhër 18-faqësh më 14 shtator. Avokatët e Trump nga studioja DLA Piper dhe Departamenti i Drejtësisë — përmes zëvendësprokurorit të përkohshëm R. Trent McCotter — kërkuan bashkërisht një “stay të menjëhershëm” nga Gjykata e Apelit të 11-të, duke i quajtur sanksionet “të paprecedenta, antikushtetuese”. Të martën, gjykata e apelit nuk pranoi t’i pezullonte.