Gjykata Kushtetuese zbardh vendimin për Rregulloren e Kuvendit

Publikohet vendimi i plotë i vendimarrjes së Gjykatës Kushtetuese për rregulloren e Kuvendit. Pas publikimit, Kuvendi ka afat 30 ditë kohë për të zbatur

Publikohet vendimi i plotë i vendimarrjes së Gjykatës Kushtetuese për rregulloren e Kuvendit. Pas publikimit, Kuvendi ka afat 30 ditë kohë për të zbatur vendimin e Kushtetuese.

Kjo e fundit rrëzoi procedurën e ndjekur për ngritjen e 11 komisioneve të përhershme parlamentarae nga Kuvendi në shtatorin e një viti më parë.

Gjykata Kushtetuese arriti në përfundimin se opozitës i ishte shkelur e drejta për të qenë pjesë e procesit që çoi në ndryshimin e numrit të Komisioneve të përhershme parlamentare nga 7 në 11.

“Thënë sa më sipër, Gjykata çmon se mënyra e thirrjes së Kuvendit në seancë plenare, si dhe procedura e përshpejtuar e miratimit të ndryshimeve të Rregullores kanë sjellë cenimin e parimit të demokracisë përfaqësuese në drejtim të lirisë së shprehjes së deputetëve të pakicës parlamentare. Për rrjedhojë, pretendimi i kërkuesit në këtë drejtim është i bazuar.

Gjykata vlerëson që efektet e këtij shfuqizimi të hyjnë në fuqi 30 ditë pas botimit të vendimit në Fletoren Zyrtare, në mënyrë që gjatë kësaj periudhe kohore Kuvendi të ketë mundësinë e organizimit të komisioneve parlamentare sipas standardeve për procedurën e miratimit të akteve, të përcaktuar në arsyetimin e mësipërm të këtij vendimi.

Në përfundim, Gjykata çmon se pretendimet e kërkuesit për cenimin e parimit të demokracisë përfaqësuese në drejtim të lirisë së shprehjes janë të bazuara, sipas arsyetimit të mësipërm të vendimit, ndaj kërkesa pranohet”, thuhet ndër të tjera në vendim.