Gjykata në Britani shpall të pafajshëm pjesëtarin e FSK-së Bali Hoxha, Prokuroria nuk paraqiti prova
Gjykata e Kurorës në Norwich e shpalli të pafajshëm Bali Hoxhën, 28 vjeç, pasi Prokuroria njoftoi se nuk do të paraqiste prova kundër tij.
Gjykata e Kurorës në Norwich, në Britani të Madhe, e shpalli të pafajshëm Bali Hoxhën, 28 vjeç, pjesëtar i Forcës së Sigurisë së Kosovës (FSK), siç njofton Shqiptarja.com. Vendimi u mor më 16 nëntor 2026, pasi Prokuroria njoftoi gjatë seancës se nuk do të paraqiste prova kundër tij.
Pas këtij njoftimi, gjykata urdhëroi regjistrimin e pafajësisë për akuzën e përdhunimit dhe të gjitha procedurat gjyqësore kundër 28-vjeçarit përfunduan. Lajmi u bë i ditur nga Ministria e Mbrojtjes e Kosovës, e cila konfirmoi qëndrimin e Prokurorisë.
Rasti kishte tërhequr edhe vëmendjen e mediave ndërkombëtare, përfshirë BBC-në, e cila raportoi në nëntor 2025 se Hoxha ishte pjesë e personelit të angazhuar në trajnimin e ushtarëve ukrainas në Britani dhe përballej me një akuzë për përdhunim dhe dy akuza për sulme seksuale ndaj një gruaje. Ai i kishte mohuar akuzat.
Sipas të njëjtave të dhëna, Hoxha ishte i vendosur në Kampin West Tofts, pranë Thetfordit, në Norfolk të Anglisë, i angazhuar në trajnimin e personelit të ushtrisë ukrainase. Incidenti i pretenduar raportohet se ka ndodhur më 17 shtator 2025, në një shteg këmbësorësh në Norwich, mes Prince of Wales Road dhe Riverside Retail Park.
Pas vendimit, Ministria e Mbrojtjes e Kosovës ritheksoi angazhimin e saj për sundimin e ligjit, pavarësinë e gjyqësorit dhe respektimin e prezumimit të pafajësisë.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.