Gjykimi për Tempin: hyjnë në javën e pestë dëshmitë e të afërmve të viktimave

Vijon sot në Gjykatën e Apelit të Krimeve të Rënda të Larisës gjykimi për tragjedinë hekurudhore të Tempit, ku në shkurt të vitit 2023 humbën jetën 57 persona. Procesi hyn këtë javë në javën e pestë të dëshmive të të afërmve të viktimave, siç raporton Newsit.gr.

Këtë javë parashikohen tre seanca, gjatë të cilave priten të dëshmojnë gjithsej 26 dëshmitarë. Javën e kaluar gjykata mori vendime mbi një sërë kërkesash të paraqitura nga pala mbështetëse e akuzës.

Ndër to, gjykata pranoi kërkesën për heqjen e fshehtësisë dhe kryerjen e një ekspertize laboratorike, nga Drejtoria e Hetimit Kriminal të Policisë Helenike, mbi celularin e stacionierit të natës së akuzuar — duke përfshirë thirrjet hyrëse dhe dalëse, SMS-të, MMS-të dhe aplikacionet e të dhënave si Viber, me përpjekje për rikuperimin e çdo skedari të fshirë që do të gjendet.

Për celularin zyrtar të ndihmës-makinistit të trenit të udhëtarëve, Nikollaos Nalmpantis, gjykata rezervoi vendimin për ekspertizën, por urdhëroi sekuestrimin e aparatit dhe hartimin e raportit të sekuestrimit nga autoriteti kompetent policor. Gjykata hodhi poshtë kërkesat për të thirrur si dëshmitarë deputetët Adonis Georgiadis dhe Dhimitris Markopoulos.

Të afërmit e viktimave paraqitën edhe tre kërkesa të reja: identifikimin dhe ekzaminimin e eshtrave të mbledhura nga vendet ku u transferua hekurishtja e trenave dhe toka nga vendngjarja; thirrjen si dëshmitarë të shtatë ish-sekretarëve të përgjithshëm të Ministrisë së Infrastrukturës dhe Transporteve për periudhën 2016–2023; si dhe prodhimin e dokumenteve të shkëmbyera mes qeverisë greke dhe Komisionit Europian për sigurinë hekurudhore.

Prekëse ishte dëshmia e Dionisis Georgiadis, babait të Gerasimos-Iasonas Georgiadis, i plagosuri rëndë që mbetet në koma që prej natës së përplasjes. Ai dëshmoi javën e kaluar për betejën që djali i tij po bën prej tre vjetësh e gjysmë, i shtruar në spitale dhe qendra shëndetësore.