Gonxhja: Karta Rinore Europiane është një mjet që fuqizon të rinjtë

Mbi 100 përfaqësues nga më shumë se 30 vende në Shqipëri për Konferencën e Kartës Rinore Europiane. Ngjarje kjo që sjell në vëmendje nxitjen e politikave dhe iniciativave europiane në mbështetje të të rinjve. Blendi Gonxhja ministër i Turizmit, Kulturës dhe Sportit shprehet se ky është një moment i rëndësishëm për vendin tonë, që për herë të parë mirëpret një konferencë të këtij niveli europian për të rinjtë.

“Për herë të parë, Shqipëria mirëpret Konferencën e Kartës Rinore Europiane, duke mbledhur mbi 100 përfaqësues nga më shumë se 30 vende europiane. Kjo ngjarje përfaqëson një vlerësim të rëndësishëm për rolin gjithnjë e më aktiv të vendit tonë në nxitjen e politikave dhe iniciativave europiane në mbështetje të të rinjve”, shprehet ministri Gonxhja në rrjete sociale. Sipas ministrit Blendi Gonxhja, në këtë kuadër, Karta Rinore Europiane po konsolidohet si një instrument konkret që zgjeron mundësitë për të rinjtë shqiptarë, duke u ofruar akses në një gamë të gjerë përfitimesh dhe eksperiencash, si: Zbritje në transport, udhëtime dhe akomodim në Shqipëri dhe në vendet europiane; Oferta në kinema, teatro, muze, koncerte dhe aktivitete të tjera kulturore; Mundësi dhe përfitime në trajnime, edukim joformal dhe zhvillim profesional;

Zbritje në aktivitete sportive dhe rekreative; Akses në një rrjet europian me miliona të rinj dhe mijëra partnerë; Mundësi për mobilitet, shkëmbime rinore dhe eksperienca ndërkombëtare. “Karta Rinore Europiane është më shumë sesa një kartë përfitimesh. Ajo është një mjet që fuqizon të rinjtë, duke i ndihmuar të kursejnë, të udhëtojnë, të zhvillojnë aftësitë e tyre dhe të krijojnë lidhje me mundësi të reja në të gjithë Europën”, vijon Gonxhja në reagimin e tij. Sipas ministrit të MTKS-së, në të njëjtën kohë, ajo kontribuon në rritjen e pjesëmarrjes aktive të të rinjve dhe në afrimin e tyre me vlerat dhe mundësitë që ofron hapësira europiane.