Gorçeviq: Mali i Zi nesër mbyll kapitujt 1 dhe 12 të negociatave me BE-në

Mali i Zi do të mbyllë nesër, në konferencën ndërqeveritare me Bashkimin Evropian, dy kapituj të tjerë negociues — Kapitullin 1, që lidhet me lëvizjen e lirë të mallrave, dhe Kapitullin 12, për sigurinë e ushqimit, politikën veterinare dhe fitosanitare — tha ministrja e Çështjeve Evropiane, Maida Gorçeviq, duke iu përgjigjur pyetjeve të deputetëve në Kuvend, siç njofton portali Biznis CG.

“Sapo mora informacionin se nesër Mali i Zi në konferencën ndërqeveritare mbyll dy kapituj negociues. Besoj se, kur flasim për suksesin e kësaj Qeverie dhe të gjithë Malit të Zi, sukseset vetëm sa vijnë duke u shtuar — Evropa tani, sot dhe nesër”, theksoi Gorçeviq, sipas raportimit të Portalit ETV, i cili njofton se konfirmimi kishte ardhur drejtpërdrejt nga Brukseli.

Deri më tani Mali i Zi ka mbyllur përkohësisht 21 nga gjithsej 33 kapitujt negociues. Brenda këtij muaji, në konferencën ndërqeveritare është planifikuar mbyllja e pesë kapitujve, me synimin që vendi t’i mbyllë të gjithë kapitujt deri në fund të këtij viti.

Konferencat e fundit ndërqeveritare priten në dhjetor, kur, siç njofton Portali ETV, duhet të mbyllen edhe kapitujt për shërbimet financiare, politikën rajonale, mjedisin dhe ndryshimet klimatike, si edhe Kapitulli 23 për gjyqësorin dhe të drejtat themelore dhe Kapitulli 24 për drejtësinë, lirinë dhe sigurinë.

Duke iu përgjigjur pyetjes së deputetes së DPS-së, Aleksandra Vukoviq Kuç, për ndryshimet e Ligjit për simbolet shtetërore dhe Ditën e Shtetësisë, Gorçeviq tha se kjo temë nuk është detyrim në rrugën evropiane dhe se puna nuk përfundon me mbylljen e kapitujve negociues, duke theksuar se për tema të tilla duhet dialog pikërisht në Kuvend.

Ministrja shtoi edhe se raporti i djeshëm i Komisionit Evropian tregoi se Mali i Zi është prijësi i procesit të zgjerimit dhe se për vendin hapen një numër i madh mundësish.