Grabitet marketi në Durrës, autori identifikohet dhe shpallet në kërkim nga Policia: Shtyu punonjësen dhe mori paratë!

Një market është grabitur ditën e sotme në Durrës (24 gusht).

Ngjarja ndodhi pranë zonës së njohur si “ish-URT”, në lagjen 17.

Autori i dyshuar, i moshës rreth 25 vjeç, ka hyrë në supermarket dhe pasi ka shtyrë me duar punonjësen e shërbimit, ka marrë nga kasa një shumë parash.

“Rreth orës 15:00, në lagjen nr. 17 në Durrës, një person ka marrë me dhunë një shumë parash nga kasa e një marketi dhe më pas është larguar nga vendngjarja. Shërbimet e Policisë kanë mbërritur menjëherë në vendin e ngjarjes dhe, pas veprimeve të shpejta hetimore, kanë bërë të mundur identifikimin e autorit të dyshuar. Sipas informacionit paraprak, bëhet fjalë për shtetasin F. S., rreth 26 vjeç. Policia vijon kontrollet në zonë me qëllim lokalizimin dhe kapjen e tij”, tha policia vendore.

Ndërkohë, grupi hetimor, nën drejtimin e Prokurorisë, po punon për dokumentimin e plotë të rrethanave të ngjarjes dhe sqarimin e përgjegjësisë së personit të dyshuar.

Fillimisht u njoftua se ai u kap menjëherë pas ngjarjes dhe është ndaluar nga policia e Durrësit, por zyrtarisht u njoftua më pas se u identifikua dhe po kërkohet për ndalim.