Grabitja në Rinas, TIA: Informacione të pasakta, e njoftuam në kohë policinë

Aeroporti Ndërkombëtar “Nënë Tereza” (TIA) ka reaguar paraditen e së hënës lidhur me grabitjen spektakolarë në Rinas të gati 1 milion eurove, duke thënë se informacionet e Policisë së Shtetit në lidhje me këtë ngjarje nuk janë të sakta.
“Kemi vënë në dispozicion të gjitha materialet dhe regjistrimet e kamerave të sigurisë. Në respekt të hetimeve, imazhit të Shqipërisë dhe personave që janë në hetim, bëjmë thirrje për kujdes në shpërndarjen e informacioneve. Kemi ndjekur me shqetësim raportimet e Policisë së Shtetit. Ne e kemi njoftuar në kohë policinë, kur makina bashkë me autorët ishte ende në vendngjarje”, theksuan autoritetet e aeroportit, duke shtuar se kompania ICTS ”vepron e paarmatosur dhe nuk ka të drejtë të ndërhyjë fizikisht”.
“Kompania ICTS është përgjegjëse vetëm për sigurinë aeroportuale dhe kjo nuk e zëvendëson apo zvogëlon përgjegjësinë e Policisë së Shtetit. ICTS është e paarmatosur dhe nuk ka të drejtë të ndërhyjë fizikisht. Jashtë gardhit, nga ku ka hyrë makina, është përgjegjësi e Policisë së Shtetit. Policia duhet të sigurojë forca për të parandaluar aktivitetet e paligjshme”, deklaroi zëdhënësja e aeroportit.