GREQI – Mitsotakis aksidentohet pas rrëzimit nga biçikleta

– Kryeministri grek Kyriakos Mitsotakis pësoi një dëmtim të lehtë në dorë dhe gërvishtje në disa pjesë të trupit, pasi u rrëzua gjatë një udhëtimi me biçikletë në Hania, në ishullin e Kretës, sipas tovima.com.

Mitsotakis u paraqit dje në një pikë të ndihmës së shpejtë në një spital të Hanias, ku mori ndihmën e parë nga personeli mjekësor.

Sipas raportimeve, pas ekzaminimit mjekët vlerësuan se kryeministri nuk kishte nevojë të qëndronte në spital për trajtim të mëtejshëm.

Gjatë qëndrimit të shkurtër në spital, Mitsotakis bisedoi me pacientë të tjerë, si dhe me mjekë dhe infermierë.

Në muajt dhe vitet e fundit, në cilësinë e kryeministrit, Mitsotakis ka vizituar disa spitale në të gjithë Greqinë, në kuadër të përpjekjeve të qeverisë për përmirësimin dhe modernizimin e sistemit kombëtar të shëndetësisë.

Në vitin 2021, ai vizitoi Spitalin e Përgjithshëm Universitar të Heraklionit, ndërsa gjatë viteve 2025 dhe 2026 ka zhvilluar vizita në disa spitale në Athinë./ a.jor.