Hamza pranon ftesën e Kurtit për takim

Kryetari i Partisë Demokratike të Kosovës (PDK), Bedri Hamza, ka konfirmuar se ka pranuar ftesën e kryetarit të Lëvizjes Vetëvendosje, Albin Kurti, për një takim që pritet të mbahet të premten, në kuadër të përpjekjeve për formimin e institucioneve të reja.

Duke folur para mediave pas mbledhjes së Kryesisë së PDK-së, Hamza bëri të ditur se i është përgjigjur pozitivisht ftesës, duke propozuar që takimi të zhvillohet në orën 09:00.

Ai theksoi se PDK-ja është e gatshme të marrë pjesë në takime politike, por nënvizoi se fokusi duhet të jetë tek prioritetet shtetërore dhe jo tek ndarja e posteve.

“Unë do të sillem në mënyrë të përgjegjshme dhe institucionale. Nuk jam kundër që të ketë takime, mirëpo para se të flasim për pozitat, e kam thënë dhe e ripërsëris se është tepër e rëndësishme të flasim për prioritetet, vizionin për të ardhmen, programin dhe adresimin e sfidave që i ka Kosova. Nëse nuk ka dakordim për këto, nuk është qëllimi i PDK-së të ketë një numër të caktuar të ministrive, një kryetar Kuvendi, presidentin apo çfarëdo pozite tjetër”, deklaroi Hamza.

Sipas tij, adresimi i sfidave me të cilat përballet vendi duhet të jetë në qendër të çdo diskutimi për krijimin e institucioneve të reja, ndërsa çështjet që lidhen me ndarjen e funksioneve duhet të vijnë vetëm pas arritjes së një pajtimi për programin dhe prioritetet e përbashkëta.