HangArt-Kinostudio hap sezonin e ri të skenës së pavarur në Tiranë

Hapësira kulturore HangArt-Kinostudio çel këtë të mërkurë, më 20 maj, zyrtarisht sezonin e ri të dedikuar skenës së pavarur, performancave bashkëkohore dhe ekspozitave artistike.

Lajmin e ka dhënë vetë ministri i Turizmit, Kulturës dhe i Sportit, Blendi Gonxhja.

Në një postim në rrjetet sociale, ai shkruan se sezoni inaugurohet me performancën “No-W-Here” të artistit Blenard Azizaj, duke shënuar nisjen e një programi të fokusuar te energjia e skenës alternative, artistët e rinj dhe format eksperimentale të krijimtarisë bashkëkohore.

HangArt synon të funksionojë si një hapësirë e hapur që mirëpret grupet joformale, performuesit që vijnë nga underground-i urban, nga komunitetet kreative, nga margjinat që po transformohen sot në qendrën më dinamike të kulturës së re shqiptare.

Performanca “No-W-Here”, me regji dhe koreografi nga Blenard Azizaj, eksploron përmes trupit dhe tingullit marrëdhënien mes pranisë, identitetit dhe hapësirës, duke ofruar një përjetim intim dhe intensiv për publikun.

Ky event do të zhvillohet në datat 20 dhe 21 maj në HangArt, Kinostudio, Tiranë, në orën 19:00. Të gjitha aktivitetet e Javës së Europës janë falas dhe të hapura për publikun.