Hansi Flick, makthi i vërtetë i Real Madridit. Trajneri gjermani dominon ndeshjet “El Clasico”

Mjafton të përmendet emri i Hansi Flick dhe një pjesë e madhe e tifozëve madrilenë fillojnë të shqetësohen. Që nga ardhja e tij te Barcelona në verën e vitit 2024, trajneri gjerman është kthyer në një makth të vërtetë për Real Madridin. Me suksesin e fundit në “Camp Nou”, Flick e ka drejtuar Barcelonën në 7 “El Clasico”, duke regjistruar 6 fitore dhe vetëm 1 humbje, atë të fazës së parë të këtij sezoni në La Liga.

Që prej ardhjes së tij në futbollin spanjoll, ai ka fituar pothuajse çdo trofe të mundshëm: 2 tituj kampionë në La Liga, 2 Superkupa të Spanjës dhe 1 Kupë të Mbretit, ndërsa vetëm Kupa e këtij sezoni shkoi për Real Sociedad.

Dominimi nuk shihet vetëm te shifrat, por edhe te fitoret bindëse që kanë tronditur madrilenët. Flick solli freski, dinamizëm dhe stabilitet te Barcelona. Falë kësaj serie, Barça barazon Realin me 106 fitore në historinë e “El Clasico”, ndërsa janë regjistruar edhe 52 barazime në 264 përballje. Pas fitores 2-0, diferenca e golave shkon në 444-441 për Real Madridin.