HAPËSIRË – Një planet si Toka, por 23 herë më masiv: shkencëtarët përballë një enigme

– Një Tokë, por shumë më e madhe. Kjo duket të jetë zbulimi i bërë nga Universiteti i Wisconsin-Madison, shkruan il messaggero.it.

Studiuesi i tij, Max Kroft, do ta prezantojë studimin në revistën shkencore The Astronomical Journal. Rezultatet mund të lexohen tashmë në faqen arXiv, një platformë ku publikohen kërkimet astrofizike përpara se të kalojnë procesin e verifikimit shkencor.

Bëhet fjalë për një planet shkëmbor, të ngjashëm me Tokën, por 2,5 herë më të madh dhe me një masë rreth 23 herë më të madhe.

Në praktikë, është një lloj “Toke gjigante” që ndodhet rreth 87 vite dritë larg nesh, një kombinim mjaft i pazakontë i masës dhe përmasave.

Sipas Kroft, në hapësirë është relativisht e lehtë të gjenden planetë shkëmborë të ngjashëm me Tokën, por zakonisht ata janë shumë më të vegjël. Këtë herë, megjithatë, përmasat janë dy herë e gjysmë më të mëdha.

Edhe pse ekziston një shumëllojshmëri e madhe planetësh, ata zakonisht mund të klasifikohen në një familje të caktuar.

Ky planet, megjithatë, nuk përshtatet lehtësisht në asnjë prej kategorive të njohura, ndaj studiuesit e konsiderojnë një lloj “Toke të dytë”.

Ai është shkëmbor, por masa e tij është aq e madhe për një planet të këtij lloji, saqë në disa aspekte i afrohet më shumë planetëve gjigantë të gaztë, si Saturni ose Jupiteri.

Planeti i ri është quajtur GJ 523b.

Vëzhgimet, të kryera në Arizona me një teleskop, tregojnë se planeti është relativisht i ri: rreth 170 milionë vjeç.

Ai rrotullohet rreth yllit të tij çdo 17,75 ditë, ka një masë rreth 23,5 herë më të madhe se Toka dhe një rreze 2,55 herë më të madhe.

Për shkencëtarët, GJ 523b është një enigmë e vërtetë. Tani ata do të kërkojnë planetë të tjerë të ngjashëm, për të kuptuar më mirë atë që duket si një përjashtim nga modelet e deritanishme të formimit të planetëve.