HAPËSIRË – SpaceX do të përplaset me Hënën në 5 gusht

– Më 5 gusht 2026, rreth orës 08:35, një pjesë e raketës Falcon 9 të SpaceX mund të përplaset me Hënën.

Sipas llogaritjeve të ekspertëve, mbetja hapësinore pritet të godasë satelitin tonë natyror pranë kraterit Einstein, në një zonë të ndriçuar nga Dielli dhe të pozicionuar drejt skajit perëndimor të diskut hënor.

Falcon 9 ishte lëshuar në janar 2025 nga Florida, duke transportuar dy module uljeje në Hënë:

Blue Ghost të kompanisë Firefly Aerospace dhe Resilience (misioni Hakuto-R) të kompanisë japoneze ispace.

Një ekip prej 23 astronomësh ka përgatitur një studim, i cili për momentin ndodhet në fazën preprint (pra ende nuk është rishikuar nga ekspertë të tjerë), ku paraqiten të gjitha parashikimet për këtë ngjarje.

Studiuesit u kanë bërë thirrje komunitetit shkencor, profesionistëve dhe astronomëve amatorë që të drejtojnë teleskopët drejt Hënës për të vëzhguar përplasjen.

Megjithatë, nuk ka asnjë arsye për shqetësim: Toka nuk do të jetë në rrezik.

Përplasja, data dhe ora e së cilës dihen paraprakisht, do t’u japë shkencëtarëve një mundësi të rrallë për të studiuar në kohë reale se çfarë ndodh menjëherë pas një përplasjeje të tillë dhe për të kuptuar më mirë rreziqet që mbeturinat hapësinore mund të paraqesin për Hënën.

Mbetja hapësinore u identifikua për herë të parë nga astronomi i pavarur Bill Gray.

Raketa Falcon 9 ishte nisur në janar 2025 me detyrën për të dërguar drejt Hënës dy module uljeje: Blue Ghost të Firefly Aerospace dhe Resilience, pjesë e misionit Hakuto-R të kompanisë japoneze ispace.

Pasi lëshoi ngarkesën e saj, faza e sipërme e raketës duhej të rikthehej në atmosferën e Tokës dhe të shpërbëhej.

Por kjo nuk ndodhi. Mbetja hapësinore përfundoi në një orbitë të lartë rreth Tokës, në një distancë të ngjashme me atë të Hënës, duke bërë që trajektorja e saj të kryqëzohej me atë të satelitit tonë natyror.