Harry Kane: Mbrojtja e avantazhit nuk ishte e mjaftueshme, na mungon diçka e vogël për të fituar një trofe

Kapiteni i Anglisë, Harry Kane, pranoi se përpjekja për të mbajtur epërsinë 1-0 dështoi, pasi shpresat e tyre për Kupën e Botës u shuan nga përmbysja 2-1 e Argjentinës në fundin e ndeshjes.

“Jam i mërzitur,” tha Kane. “Jam i mërzitur për djemtë, jam i mërzitur për të gjithë, ekipin, stafin, tifozët. Ne luajtëm një ndeshje të mirë për pjesën më të madhe të saj. Sapo shkuam 1-0 përpara, dukej se po përpiqeshim të mbanim rezultatin, gjë që në këtë nivel nuk është e mjaftueshme, kështu që jam i mërzitur”.

“Ne punuam shumë për të qenë këtu. Djemtë kanë dhënë çdo përpjekje, djersë, gjak, lot, çfarëdo qoftë, kështu që të dështojmë është thjesht shkatërruese“, shtoi sulmuesi anglez. Kane pretendoi se mesazhi nga Tuchel dhe stafi i tij ishte të vazhdonin të shtynin pas golit të Gordon, por ndjeu sikur Anglia po tërhiqej gjithnjë e më shumë, duke pritur presionin të cilin Argjentina e ktheu në avantazhin e saj.

“Ne luftuam për të ushtruar presion mbi topin pas golit. Mendoj se veçanërisht në pjesën e parë dhe në fillim të pjesës së dytë i shtymë mirë, i vumë nën shumë presion, veçanërisht lart në fushë, gjë që na lejoi të fitonim topa dhe ta kontrollonim lojën pak më mirë”, tha sulmuesi.

Më tej, Harry Kane komentoi: “Pas golit, pavarësisht nëse ata po vendosnin më shumë lojtarë përpara apo ne nuk ishim në gjendje t’i përballonim ata në lojën “tek për tek”. Djemtë po vendosnin bllokime, por në fund nuk ishte e mjaftueshme”.

“Djemtë ishin gjithmonë të gatshëm për çdo moment të ndeshjes. Kur ne kaluam përpara, mesazhi ishte të shkonim përsëri dhe të shënonim një gol tjetër. Pasi ata shënuan dy golat e tyre, ne u përpoqëm të gjenim diçka, por nuk mundëm të gjenim asnjë moment për t’u rikthyer në lojë“, tha Kane.

“Kemi pasur shumë momente të mira në këtë turne. Kemi pasur shumë ndeshje të mira, një tjetër gjysmëfinale. Jemi afër. Thjesht duhet të gjejmë atë copë që mungon. Këto turne të heqin gjithçka. Ka shumë përpjekje, presion, mentalitet. Kemi treguar shumë nga kjo në gjashtë, shtatë javët e fundit që kemi qenë së bashku. Thjesht na mungon ajo copëza e fundit“, tha sulmuesi anglez.