Haxhiu për protestat në Shqipëri: Të dëgjohen kërkesat e studentëve, dhuna të ndalet nga të dyja palët

Kryetarja e Kuvendit të Kosovës, Albulena Haxhiu, ka shprehur shqetësim për zhvillimet në Shqipëri, duke thënë se kërkesat e protestuesve duhet të dëgjohen nga institucionet. Siç njofton Press7, ajo e bëri deklarimin pas mbledhjes së Kryesisë së Kuvendit, të hënën.

“Është shumë e rëndësishme që kërkesat e protestuesve të dëgjohen nga institucionet, besoj që secili prej drejtuesve të institucioneve atje, Kuvendi, Qeveria dhe Presidenca e ka për obligim që t’i trajtojë kërkesat e studentëve, a janë ato që kanë dalë tash, a janë ato të shtresuara që kanë nisur para disa viteve”, ka thënë Haxhiu, sipas raportimit të Press7.

Sipas raportimit të Fronti24, Haxhiu tha se ajo që po ndodh në Shqipëri shqetëson të gjithë në Kosovë, sepse, siç u shpreh ajo, “Shqipëria për ne është shtëpi”.

Ajo theksoi se dhuna nuk mbështetet dhe duhet të ndalet nga të dyja palët, edhe nga protestuesit edhe nga Policia. “Natyrisht që ne nuk e mbështesim dhunën, dhuna duhet të ndalohet nga të dyja palët, mendoj që është e rëndësishme qasja serioze në raport me këto protesta, jo arroganca, mendoj që arroganca vetëm nxit këto protesta, prandaj edhe thërras me maturi, me seriozitet të tejkalohen ndasitë”, ka theksuar Haxhiu, siç njofton Press7.

Haxhiu shtoi se Lëvizja Vetëvendosje nuk ka bërë asnjëherë thirrje për pjesëmarrje në ato protesta dhe se kjo nuk i takon asaj. Sipas saj, LVV-ja nuk mund të mbahet përgjegjëse për pjesëmarrjen e ndonjë qytetari nga Kosova, pasi, siç tha ajo, si parti ka mbështetje të madhe.