Hegseth hedh poshtë pretendimet: Ushtria amerikane nuk ka mungesë të municioneve

Sekretari amerikan i Mbrojtjes, Pete Hegseth, ka hedhur poshtë pretendimet se ushtria e Shteteve të Bashkuara po përballet me mungesë të rezervave të municioneve, duke i cilësuar raportimet në media si të pavërteta.

Në një deklaratë publike, Hegseth tha se zërat për dobësimin e rezervave ushtarake amerikane janë një “histori e sajuar”, duke insistuar se kapacitetet mbrojtëse të SHBA-së mbeten të forta dhe të gatshme për çdo sfidë.

Komentet e tij erdhën vetëm disa orë përpara njoftimit se Shtetet e Bashkuara dhe Irani kishin arritur një marrëveshje për t’i dhënë fund konfliktit në Lindjen e Mesme, duke përfshirë ndalimin e luftimeve në disa fronte dhe rihapjen e Ngushticës së Hormuzit.

Debati mbi rezervat amerikane të armëve është intensifikuar javët e fundit, mes shqetësimeve se angazhimet ushtarake dhe mbështetja për aleatët mund të ndikojnë në furnizimet strategjike të Uashingtonit.

Këto shqetësime u shtuan muajin e kaluar kur Sekretari në detyrë i Marinës Amerikane, Hung Cao, përmendi konfliktin në Lindjen e Mesme si një nga faktorët që ndikuan në vendimet lidhur me shitjet e armëve për Tajvanin.

Megjithatë, Pentagoni këmbëngul se forcat e armatosura amerikane disponojnë rezerva të mjaftueshme dhe se gatishmëria ushtarake e vendit nuk është vënë në rrezik.