SHBA – Trump akuzon Ukrainën se nuk i ka dhënë asgjë SHBA-së në këmbim të mbështetjes amerikane

UASHINGTON, 20 tetor /ATSH-DPA/- Presidenti i SHBA-së, Donald Trump ka akuzuar Ukrainën se nuk i ka dhënë asgjë Amerikës në këmbim të mbështetjes që Uashingtoni i ka ofruar.

“Ne i kemi dhënë shumë Ukrainës. Ata nuk na kanë dhënë asgjë. Mbajeni mend këtë”, u tha dje Trump gazetarëve në Uashington.

Ndërkohë, faqja amerikane e lajmeve “Axios” raportoi se presidenti ukrainas, Volodymyr Zelensky është ankuar se Uashingtoni po vonon dërgesat e armëve për Ukrainën.

Sipas “Axios”, Zelensky e ngriti këtë shqetësim gjatë një takimi virtual me senatorë amerikanë nga të dyja partitë politike, demokratët dhe republikanët.

Sipas Zelensky, sekretari amerikan i Mbrojtjes, Pete Hegseth ka refuzuar të miratojë dërgesat e raketave për sistemet e mbrojtjes ajrore “Patriot” dhe të llojeve të tjera, megjithëse vendet e NATO-s kishin paguar tashmë për to. “Axios” e raportoi këtë duke iu referuar një transkripti të takimit.

“E gjithë kjo tregon se është marrë një vendim politik për të ngadalësuar mbështetjen ndaj nesh”, citohet të ketë thënë Zelensky.

Edhe gazeta “The Washington Post”, duke iu referuar personave të informuar për çështjen, raportoi se pezullimi kishte prekur edhe dërgesat e armëve nga partnerë të tjerë të Ukrainës, të cilat kërkonin miratimin e Uashingtonit.

Megjithatë, një zyrtar i lartë i Departamentit amerikan të Mbrojtjes i kundërshtoi këto raportime, duke thënë se nuk kishte pasur asnjë ndryshim në programin përmes të cilit vendet e NATO-s blejnë armë amerikane për Ukrainën.

Sipas zyrtarit, nuk ka pasur ndryshime as në shkëmbimin e informacioneve të inteligjencës, të të dhënave të mbledhura përmes shërbimeve të zbulimit.

Trump shtoi kritikat ndaj Kievit pasi Zelensky sugjeroi se qëndrimi i presidentit amerikan, të cilin e konsideroi të favorshëm për Kremlinin, po e vendoste atë në anën e gabuar të historisë.

“Zelensky nuk e di se për çfarë po flet”, u përgjigj Trump.

Presidenti amerikan tha se Zelensky nuk po ndihmonte në përpjekjet për t’i dhënë fund luftës. /