Hita në Maqedoninë e Veriut, apel për zgjerimin e Task-Forcës rajonale kundër emigracionit: Bashkëpunimi është çelësi

Emigracioni i parregullt nuk mund të luftohet pa bashkëpunim rajonal dhe zgjerim të mekanizmave të përbashkët kundër krimit të organizuar.

Ky ishte mesazhi që përcolli Drejtori i Përgjithshëm i Policisë së Shtetit, Skënder Hita, gjatë tryezës për zgjerimin e Task Forcës së Përbashkët kundër Migracionit të Parregullt, të zhvilluar në Maqedoninë e Veriut.

Hita propozoi që Greqia dhe Bosnjë-Hercegovina t’i bashkohen Task Forcës si anëtare me të drejta të plota, duke e cilësuar këtë si një hap të rëndësishëm për forcimin e bashkëpunimit rajonal.

Sipas tij, migracioni i parregullt lidhet ngushtë me veprimtarinë e grupeve kriminale, trafikimin e qenieve njerëzore, falsifikimin e dokumenteve, pastrimin e parave dhe forma të tjera të krimit të organizuar ndërkombëtar.

“Task Forca është më shumë se një mekanizëm bashkëpunimi. Është një shembull konkret i asaj që mund të arrijmë kur informacioni, ekspertiza dhe veprimi operacional i vendeve tona bashkohen në kohë”, u shpreh Hita.

Ai vlerësoi gjithashtu rezultatet e Task Forcës Shqipëri–Mbretëri e Bashkuar, e ngritur në vitin 2023 dhe më pas e zgjeruar me Kosovën, Maqedoninë e Veriut dhe Malin e Zi, duke theksuar se operacionet e përbashkëta, shkëmbimi i informacionit dhe hetimet e koordinuara kanë forcuar goditjen ndaj grupeve kriminale.