Holandë, sot vendimi për Radovan Karaxhiç
Gjyqi ndaj Radovan Karaxhiç, ish-Presidentit serb të Bosnjës dhe komandantit të ushtrisë serbe të Bosnjës, pritet të mbyllet sot (e enjte) në Gjykatën Kriminale për ish-Jugosllavinë në Hagë.
Karaxhiç përballet me burg të përjetshëm pasi mbi të rëndojnë 11 akuza për krime lufte, krime kundër njerëzimit, vrasje, deportim, terror dhe sulme të paligjshme kundër civilëve.
Ish-lideri serbo-boshnjak përballet edhe me akuzën për gjenocid, për vrasjen e më shumë se 8 mijë burrave dhe djemve myslimanë nga Srebrenica, kur forcat etnike serbe ekzekutuan pengjet.
Karaxhic, që qëndroi në arrati për 13 vjet pasi u akuzua në 1995, po ashtu përballet edhe me akuza në lidhje me rrethimin 43 mujor të kryeqytetit boshnjak, Sarajevë, ku vdiqën më shumë se 5 mijë civilë.
Ai u arrestua në një autobus në periferi të Beogradit në korrik të vitit 2008, ku kishte jetuar duke u maskuar si një doktor i mjekësisë alternative. Karaxhiç kishte rritur flokët, kishte lënë mjekër dhe kishte vendosur syze për të mos u njohur.
Pas arrestimit, u ekstradua në Holandë për t’u përballur me gjykatësit e Hagës. Ai është munduar pa sukses ta vonojë gjyqin e tij ndërkohë që ka tentuar të rrëzojë edhe akuzat me pretendimin se ish-ndërmjetësi amerikan për paqen, Ricard Hollbruk, i kishte ofruar atij imunitet në vitin 1996 nëse largohej nga jeta publike.
