Hoxha: Integrimi në BE mbetet prioritet, negociatat nuk janë bllokuar

Ministri për Evropën dhe Punët e Jashtme, Feri Hoxha, ka deklaruar se anëtarësimi i Shqipërisë në Bashkimin Evropian mbetet një nga objektivat më të rëndësishëm të qeverisë, duke theksuar se procesi i negociatave vijon normalisht dhe nuk është i bllokuar.

Gjatë një prononcimi mbi ecurinë e integrimit europian, Hoxha u ndal te marrëdhëniet me BE-në, ritmi i reformave dhe perspektiva e zgjerimit, duke bërë thirrje edhe për një klimë më konstruktive politike në vend.

“Marrëdhëniet tona me BE-në dhe vendet anëtare nuk kanë qenë asnjëherë më të ngushta se sot. Rezultatet konkrete dhe reformat janë i vetmi kriter vlerësimi për BE-në. Vendi ka avancuar me një ritëm të përshpejtuar dhe të vlerësuar, Shqipëria ka konsoliduar pozicionin e saj së bashku me Malin e Zi. Kur flitet për zgjerim, përmendet edhe Shqipëria dhe objektivi për të mbyllur negociatat teknike në vitin 2027. Zyrtarët më të lartë të BE-së kanë theksuar se, nëse ruhet ritmi aktual, ky objektiv i anëtarësimit brenda vitit 2030 është absolutisht i arritshëm. Procesi kryesor është ai i shqyrtimit të raportit të KE-së për piketat e ndërmjetme. Ndryshe nga sa dëgjohet, ky proces nuk është bllokuar e as ndaluar nga shtetet anëtare. Si çdo vend kandidat, Shqipëria nuk është pjesë formale e diskutimeve të brendshme në KE; do të jetë në atë tryezë vetëm kur të jetë anëtare. Procesi i integrimit duhet të mbështetet në një klimë konstruktive dialogu dhe bashkëpunimi”, tha Hoxha.