Humb jetën 27-vjeçari në Kamëz, e zuri korrenti teksa po rregullonte një depozitë uji

Një 27-vjeçar ka humbur jetën në Kamëz, pasi dyshohet se ka rënë në kontakt me telat e linjës elektrike të tensionit të lartë.

Ngjarja ka ndodhur mbrëmjen e kësaj të hëne, rreth orës 20:00, në rrugën “Adriatik”, në lagjen nr. 5, Kamëz.

Sipas policisë, i riu, i identifikuar si Roland Toshi, ndodhej në banesën e xhaxhait të tij dhe ishte duke rregulluar depozitën e ujit mbi banesë, kur ka rënë në kontakt me telat e linjës elektrike të tensionit të lartë, të cilat ndodheshin sipër banesës.

27-vjeçari është dërguar për ndihmë mjekësore në Spitalin e Traumës, por si pasojë e dëmtimeve të marra ka humbur jetën.

Grupi hetimor, nën drejtimin e Prokurorisë, vijon punën për sqarimin e plotë të rrethanave të ngjarjes.