Huthi-t godasin aeroportet e Jazan-it dhe Najran-it në Arabinë Saudite: tre të plagosur

Dy aeroporte në jug të Arabisë Saudite u goditën të hënën në mbrëmje në sulme që lanë tre persona të plagosur dhe dëme materiale, njoftoi Autoriteti i Aviacionit Civil të mbretërisë, siç raporton Al Jazeera.

Sipas deklaratës zyrtare, në shënjestër ishin Aeroporti Ndërkombëtar “Mbreti Abdullah bin Abdulaziz” në Jazan dhe Aeroporti Ndërkombëtar i Najran-it. “Ekipet e specializuara ndërhynë menjëherë pas ndodhjes së sulmeve”, thuhet në deklaratë. “Sulmet shkaktuan tre lëndime me shkallë të ndryshme rëndesie dhe dëme materiale. Të plagosurit u transportuan në spital për kujdesin e nevojshëm mjekësor.”

Autoriteti tha se po vazhdon vlerësimin e dëmeve dhe po merr “të gjitha masat e nevojshme për të garantuar sigurinë e pasagjerëve dhe personelit të aeroporteve dhe për të ruajtur sigurinë e sistemit të aviacionit civil të Mbretërisë”.

Sulmet vijnë në mes të përshkallëzimit të luftimeve në Jemen, ku Huthi-t e mbështetur nga Irani kanë shtuar sulmet me raketa dhe dronë ndaj objektivave saudite, ndërsa koalicioni i udhëhequr nga Arabia Saudite ka nisur një kundër-ofensivë për çlirimin e Ngushticës Bab al-Mandeb. Aeroportet e rajoneve kufitare jugore të mbretërisë janë vënë shpesh në shënjestër gjatë konfliktit.