I dërguari special i Trumpit në Groenlandë, Jeff Landry mbërrin në Nuuk

I dërguari special i Trump për të nxitur kontrollin amerikan të Groenlandës, Jeff Landry mbërriti në Nuuk të dielën. Landry, guvernatori i Luizianës, më parë e ka mbështetur qëllimin e Trump për ta bërë territorin e gjerë të Arktikut pjesë të Shteteve të Bashkuara.

Ambicia është kundërshtuar fuqimisht si nga qeveritë e Groenlandës ashtu edhe nga ato daneze, të cilat kanë thënë vazhdimisht se Groenlanda nuk është në shitje.

Ai është planifikuar të marrë pjesë në konferencën e biznesit ‘Future Greenland’ më 19-20 maj dhe do të shoqërohet nga ambasadori i SHBA-së në Danimarkë, Kenneth Howery.

Organizatori i konferencës, Business Greenland, nuk e ftoi Landry-n, por tha se eventi ishte i hapur për këdo që mund të regjistrohej.

Ambasada amerikane në Kopenhagen tha më herët këtë javë se Landry dhe Howery do të takoheshin me banorë të Groenlandës për të dëgjuar dhe për të mësuar me qëllim zgjerimin e mundësive ekonomike, ndërtimin e lidhjeve njerëzore dhe rritjen e mirëkuptimit midis Shteteve të Bashkuara dhe Groenlandës.

Në përpjekje për të qetësuar tensionet, Groenlanda, Danimarka dhe SHBA-të më parë këtë vit ranë dakord të zhvillojnë negociata diplomatike të nivelit të lartë për të zgjidhur krizën, megjithëse rezultati i këtyre bisedimeve në vazhdim ende nuk është prezantuar.

Kryeministri i Groenlandës, Jens-Frederik Nielsen, ta më parë këtë javë se rritja e pranisë ushtarake amerikane ishte pjesë e negociatave të vazhdueshme me Uashingtonin.

Deri më tani, nuk është konfirmuar asnjë takim zyrtar midis Landry-t dhe politikanëve të Groenlandës gjatë vizitës së tij.