I ekstraduari për krim kibernetik Ardit Kutleshi, Ambasada amerikane: Shembull i bashkëpunimit me Kosovën

Shtetasi i Kosovës, Ardit Kutleshi, 28 vjeç, pritet të përballet me dënim me burgim në Shtetet e Bashkuara të Amerikës, pasi ka pranuar fajësinë lidhur me krijimin dhe operimin e platformës së paligjshme “Rydox”.

Sipas autoriteteve amerikane, “Rydox” funksiononte si një faqe interneti dhe treg online ku kriminelët kibernetikë mund të blinin, shisnin dhe shkëmbenin të dhëna personale të vjedhura.

Përmes kësaj platforme, përdoruesit kishin gjithashtu mundësi të siguronin pajisje dhe mjete që përdoreshin për kryerjen e krimeve kibernetike dhe mashtrimeve të ndryshme.

Lidhur me rastin ka reaguar edhe Ambasada e Shteteve të Bashkuara të Amerikës në Kosovë, e cila e ka cilësuar procesin si një tjetër shembull të bashkëpunimit të suksesshëm ndërmjet SHBA-së dhe Kosovës në luftën kundër krimit kibernetik transnacional.

Ambasada ka falënderuar Zyrën e Kryeprokurorit të Prokurorisë Speciale të Kosovës, Blerim Isufaj, institucionet e Kosovës dhe të gjithë zyrtarët e përfshirë në trajtimin e rastit.

“Një tjetër shembull i bashkëpunimit të suksesshëm SHBA-Kosovë në luftën kundër krimit kibernetik transnacional. Faleminderit Zyrës së Prokurorit Special të Kosovës dhe institucioneve të Kosovës, si dhe të gjithë të përfshirëve, për bashkëpunimin e tyre të shkëlqyer në sjelljen e këtij rasti para drejtësisë!”, thuhet në reagimin e Ambasadës së SHBA-së në Kosovë.

Kutleshi tashmë ka pranuar fajësinë, ndërsa dënimi ndaj tij pritet të caktohet nga autoritetet gjyqësore amerikane.