I nxehti përvëlues, IGJEO jep alarmin: Ja 8 qarqet më të rrezikuara në fundjavë dhe harta e zjarreve! Mbi 500 forca dhe 4

I nxehti ekstrem saharian ka përfshirë edhe Shqipërinë prej javësh, ndërsa vendi po vuan me valën e zjarreve, një pjesë e mirë e të cilave si pasojë e piromanisë.

Por rreziku mbetet ende evident edhe këto ditë gushti. Janë të paktën 8 qarqe në gjithë vendin që do të përballen edhe këtë fundjavë me rrezik të lartë nga zjarret, ndikuar kjo edhe nga temperaturat në rritje që pritet të kapin vlerat mbi 39 gradë Celsius.

Përmes publikimit të Buletinit të Rreziqeve, Instituti i Gjeoshkencave bën të ditur se situata më kritike paraqitet kryesisht në Ultërsirën Perëndimore, në qarqe si Lezha, Durrësi, Tirana, Elbasani, Fieri, Berati, Gjirokastra dhe Vlora.

Megjithëse në qarkun e Shkodrës, Kukësit, Dibrës dhe Korçës rreziku paraqitet në nivel më të ulët, në disa zona të lokalizuara të tyre pritet rrezik i lartë nga zjarret (harta në foto).

Po kush janë ‘hotspotet’ e piketuara nga specialistët dhe ku vijon të jetë situata ende kritike nga vatrat e zjarreve?

Aktualisht, situata më alarmante nga flakët paraqitet në qarkun e Fierit, ku prej disa ditësh vijon të jetë aktiv zjarri në disa fshatra të Mallakastrës. Në fshatrat Riban, Ngraçan dhe Panahor zjarri ka marrë përmasa të mëdha dhe një shtrirje prej rreth 180 hektarësh, ku situata më kritike paraqitet në Panahor.

Për rrjedhojë, për shuarjen e flakëve po operohet edhe nga ajri me helikopter, kurse në terren janë angazhuar 40 trupa të Forcave të Armatosura, 4 mjete zjarrfikëse dhe 55 zjarrfikës. Megjithatë, autoritetet thonë se flakët nuk paraqesin rrezik për banesat.

Në Dajt vijon puna për shuarjen e zjarrit që ka përfshirë masivin pyjor në Priskë dhe Çakallesh, ku sipas Agjencisë së Mbrojtjes Civile zjarri nuk paraqet rrezik për zonat e banuara.

Në qarkun Elbasan prej disa ditësh vijojnë të jenë aktive vatrat e zjarrit në fshatin Shqiponjë, në malin e Dardhës dhe në Mjekës. Autoritetet vendore bëjnë me dije se zjarri në Shqiponjë është në kontroll, ndërsa vatra në malin e Dardhës është izoluar. Po ashtu, nuk raportohet rrezik për komunitetin.

Në Bashkinë e Beratit është rindezur zjarri në fshatin Kostren 2, ku zjarrfikësit vijonë punën për shuarjen e flakëve.

Në operacionet për shuarjen e zjarreve në të gjithë vendin janë angazhuar 54 automjete zjarrfikëse dhe 502 forca operacionale, ndërsa në mbështetje janë angazhuar 110 efektivë të Forcave të Armatosura, 3 helikopterë dhe avioni “Air Tractor” i Forcës Ajrore.