Informalitetit, falen 23.768 miliardë lekë detyrime të prapambetura

Mbi 28 mijë biznese u verifikuan në terren në 13 javët e aksionit kundër informalitetit nga strukturat e hetimit tatimor, ku 18.7% e tyre kanë rezultuar me shkelje dhe janë penalizuar.

Ndërkohë, gjatë kësaj periudhe u regjistruan afërsisht 5 585 subjekte të reja.

Sipas të dhënave nga Drejtoria e Përgjithshme e Tatimeve, janë futur në skemën e sigurimeve shoqërore gjatë 13 javëve të aksionit mbi 1 mijë punonjës dhe janë mbyllur 573 subjekte të paregjistruara në organet tatimore, si dhe për shkelje të tjera, ndër të cilat, mos lëshimi i kuponit për herë të dytë.

Gjatë kësaj periudhe numri i subjekteve që kanë reaguar pozitivisht është 3 701 dhe vlera është 3.1 miliardë lekë.

Më shumë se 42 458 tatimpagues kanë përfituar nga procesi i fshirjes automatike të detyrimeve përpara vitit 2010 dhe atë 2011-2014, gjithashtu dhe fshirja e detyrimeve me kusht për periudhën 2011-2014 dhe për ata tatimpagues që kanë paguar principalin.

Si rezultat i këtij procesi, shuma e detyrimit të falur është 23.768 miliardë lekë dhe përdorimi i kredisë për shlyerjen e detyrimeve në nivel principali është në vlerën e 3,608 miliardë lekëve.

Për 13 javët e para të fushatës është mundësuar përfundimi i 19,887 kontrolleve (kontrolle nga zyra, vizita fiskale apo verifikime në terren). Kontrollet nga zyra përbejnë 72.3% të totalit.