Inspektime në pikat kufitare dhe policinë locale, Komisioni i Sigurisë vlerëson kapacitetet në Qafë Thanë, Kakavijë dhe Korçë

Komisioni Parlamentar për Çështjet e Brendshme dhe Mbrojtjen ka përfunduar një sërë takimesh monitoruese në pikat strategjike kufitare të vendit dhe në strukturat e pushtetit lokal. Vizitat u zhvilluan në Pikat e Kalimit Kufitar Qafë Thanë dhe Kakavijë, si dhe në Bashkinë e Pogradecit dhe Drejtorinë Vendore të Policisë Korçë, me qëllim vlerësimin e sigurisë kombëtare dhe menaxhimit të kufijve.

Gjatë këtyre inspektimeve në terren, theksi i Komisionit u vendos në disa shtylla kryesore: organizimi institucional, kapacitetet operacionale të forcave të rendit, kushtet infrastrukturore të godinave dhe niveli i bashkëpunimit ndërinstitucional.

Nga prezantimet e mbajtura nga drejtuesit lokalë dhe ata të Policisë së Shtetit, u evidentuan arritjet e deritanishme në drejtim të përmirësimit të shërbimeve për udhëtarët dhe rritjes së perimetrit të sigurisë publike e kufitare. Një vëmendje e veçantë iu kushtua edhe situatës aktuale të emergjencave civile në këto rajone. Diskutimet u përqendruan tek masat e ndërmarra, kapacitetet logjistike në dispozicion dhe nevojat imediate për t’u përballur me krizat e mundshme.

“Përballja me sfidat aktuale të sigurisë dhe emergjencave kërkon një qasje të koordinuar ndërinstitucionale për një menaxhim sa më efektiv në terren,” u theksua gjatë takimeve monitoruese.

Angazhimi për mbështetje legjislative

Pas përfundimit të turit monitorues, Komisioni për Çështjet e Brendshme dhe të Mbrojtjes rikonfirmoi angazhimin e tij institucional për të qenë një partner mbështetës.

Përmes rolit të tij mbikëqyrës dhe legjislativ në Parlament, Komisioni synon të nxisë përmirësimin e vazhdueshëm të standardeve dhe kushteve të punës për efektivët. Qëllimi përfundimtar mbetet rritja e eficiencës së strukturave të Policisë së Shtetit dhe pikave doganore, në funksion të garantimit të sigurisë kombëtare dhe lehtësimit të procedurave të lëvizjes për qytetarët.