Inter- Shakhtar, Chivu: Nuk ka ndeshje të lehta në Champions, fitorja detyrim

Është një provë për ekipin, por edhe një testim “individual”: fakti që Interi duhet të fitojë ndaj Shakhtar Donetskut është i qartë – renditja e tregon këtë – por është po aq thelbësore që Cristian Chivu të lërë pas negativitetin e vazhdueshëm dhe kritikat e ashpra e personale që kanë pasuar katër humbjet e fundit radhazi në Ligën e Kampionëve – një ecuri që përkthehet në shtatë humbje në tetë paraqitjet e fundit evropiane.

Ndërsa trajneri i zikaltërve po ecën me ritme të shpejta në kampionat — ashtu siç bëri sezonin e kaluar dhe siç po bën edhe tani — në Evropë situata është krejtësisht ndryshe. A bëhet fjalë për mentalitet? Qëndrim? Taktikë? Apo ndoshta për një hendek teknik? Pas humbjeve ndaj Realit dhe Club Brugge, është thënë e shkruar gjithçka, dhe një pjesë e madhe e fajit i është atribuar drejtpërdrejt atij.

Tani, për të arritur objektivin minimal të fazës “play-off”, është thelbësore të sigurohen tri pikët e para: “Dua që lojtarët e mi të argëtohen, edhe kur përballen me vështirësi. Ata duhet të jenë të vetëdijshëm për rëndësinë e këtyre ndeshjeve dhe të marrin përgjegjësi, pa e humbur kurrë nga sytë vetë lojën. Kjo e bën fitoren më të lehtë.”

Megjithatë, prej kohësh tashmë, nuk ka pasur shumë arsye për të festuar në Evropë: “Nuk ka nevojë të ndalemi gjatë te kjo; e dimë që vijmë pas dy humbjesh, si dhe të tjera në të kaluarën. Por dua që të përqendrohemi te ajo që duhet të bëjmë nesër për të siguruar rezultatin.”

Do të jetë një ndeshje e vështirë: “Si në të gjitha ndeshjet e Ligës së Kampionëve, kundërshtarët tanë nuk kanë asgjë për të humbur dhe kanë shumë ambicie; do të na duhet qasja e duhur për të dalë fitimtarë.”

Por a mund ta fitojë Interi Ligën e Kampionëve? “Pyetjeve të tilla u përgjigjemi – thotë ai, duke iu referuar edhe një pyetjeje që iu bë Bastonit, i cili ishte ulur pranë tij në konferencën për shtyp – thjesht nga mirësjellja; për ne, është një ëndërr. Por për momentin, ajo që ka rëndësi është të fitojmë nesër; ky është i vetmi prioritet.”

Ende nuk ka komente. Bëhuni i pari që komenton.