Investimet në veri duhet të jenë më të mëdha: Plava mirëpret masat, kritikon ndarjen politike të fondeve

Për zhvillimin e veriut të Malit të Zi në vitin 2026 janë parashikuar 48 milionë euro, nga të cilat deri tani janë shpenzuar 11,5 milionë. Ministri i Zhvillimit Rajonal të Investimeve, Ernad Suljević, njoftoi masa të reja mbështetjeje për veriun, si dhe miratimin e ligjit për zhvillimin rajonal.

Nga Komuna e Plavës masat e njoftuara mirëpriten, por atje porositin se investimet në veri duhet të jenë më të mëdha dhe se paratë duhet t’u shkojnë komunave që kanë projekte cilësore e të gatshme, jo atyre me ndikim politik më të madh. “Kjo pjesë e shtetit tonë përballet me sfida të shumta, nga migrimi i popullsisë deri te infrastruktura e pazhvilluar rrugore dhe komunale”, thuhet në reportazhin e RTCG-së.

Kryetari i Plavës, Nihad Canović, renditi projektet kryesore për komunën e tij: hapjen e pikës kufitare në Çakor, ndërtimin e rrugës Plav–Bogićevica, revitalizimin dhe mbrojtjen e Liqenit të Plavës si dhe ndërtimin e shëtitores përreth tij — projekte që, sipas tij, duhet të gjenerojnë mundësi të reja punësimi dhe aktivitet ekonomik. “Besoj se kemi realizuar një sërë projektesh investuese, kemi ndryshuar ambientin, kemi miratuar masa stimuluese që njerëzit të njohin cilësinë dhe mundësitë që ofron jeta në Plavë”, tha Canović.

Ai kritikoi mënyrën e ndarjes së investimeve: “Investimet, kur planifikohen për vitin e ardhshëm, nuk ndahen sipas gatishmërisë së komunës për t’i realizuar, por sipas atij që ka ndikim politik më të madh në atë moment, gjë që nuk është e mirë për zhvillimin e veriut.” Plava ka realizuar mbi 70% të investimeve të planifikuara këtë vit.

Ministria planifikon mbështetje deri në 70% të kostove të pranueshme të investimeve për sipërmarrësit në komunat me shkallë më të ulët zhvillimi — Petnjica, Guci, Andrijevica, Rozhaja, Berane, Bijelo Polje, Shavnik, Pluzhine dhe Plavë — dhe deri në 80% për ndërmarrjet në pronësi shumicë të grave dhe të rinjve. Canović theksoi se pa infrastrukturën bazë rrugore dhe furnizimin cilësor me energji, asnjë subvencion nuk mjafton për të nisur një biznes.

Ministria e Punëve Publike njoftoi se në tre vitet e fundit ka realizuar 129 projekte në veri me gati 157 milionë euro, nga të cilat është shpenzuar gati gjysma.

Burimi: RTCG