Irani niset për në kampin stërvitor në Antalia të hënën

Ekipi kombëtar i Iranit do të niset të hënën në mëngjes për në kampin stërvitor në Turqi përpara se të udhëtojë për në Shtetet e Bashkuara për Kupën e Botës, e cila fillon më 11 qershor. Kampi stërvitor do të zhvillohet në Antalia, ku ekipi kombëtar iranian luajti ndeshje miqësore në fund të marsit, deklaroi trajneri i skuadrws, Ghalenoei në faqen e internetit të Federatës. Skuadra do të përbëhet nga 30 lojtarë, të cilët më vonë do të reduktohen në 26. Midis atyre që janë thirrur janë portieri veteran i Tractor SC, Alireza Beiranvand (33) dhe sulmuesi i Olympiacos, Mehdi Taremi.

“Zgjedhja e 30 lojtarëve për këtë kamp stërvitor para Kupës së Botës ishte vendimi më i vështirë teknik i karrierës sime si trajner”, tha Ghalenoei, duke specifikuar se e përpiloi skuadrën bazuar vetëm në “kritere teknike”.

Irani shpreson të luajë dy miqësore në Antalia, megjithëse deri më tani është konfirmuar vetëm një ndeshje kundër Gambias, më 29 maj. Në Turqi, lojtarët do të duhet të përfundojnë gjithashtu procesin e aplikimit për vizë për Shtetet e Bashkuara. Në këtë drejtim, Sekretari i Përgjithshëm i FIFA-s, Mattias Grafstrom, pati “një takim të shkëlqyer dhe konstruktiv” me presidentin e Federatës së Futbollit të Iranit (FFIRI), Mehdi Taj. Reuters raportoi takimin në Stamboll në faqen e saj të internetit.

Grafstrom nuk dha detaje mbi situatën e vizave, por tha se palët patën mundësinë të diskutonin disa çështje operacionale. I pyetur nëse FIFA kishte marrë siguri në lidhje me procedurat e hyrjes dhe vizave për lojtarët iranianë, Grafstrom shmangu: “Ne diskutuam të gjitha çështjet përkatëse, por mendoj se ky nuk është vendi për të zbuluar detajet”.