Ish-kandidati për president në Rumani nën hetim për një skemë mashtrimi prej 1.1 milion eurosh

Prokurorët rumunë njoftuan të hënën se po hetonin, ish-kandidatin pro-rus në zgjedhjet presidenciale të anuluara të vitit 2024 në vend, Calin Georgescu-n. Hetimet ndaj tij kanë të bëjnë me një skemë mashtrimi prej 1.1 milion eurosh.

Shteti anëtar i Bashkimit Evropian dhe i NATO-s anuloi zgjedhjet e saj presidenciale në dhjetor 2024 për shkak të ndërhyrjes së dyshuar ruse në favor të Georgescu-t, një kritik i fortë i NATO-s, Brukselit dhe mbështetjes perëndimore për Ukrainën. Moska i mohoi akuzat për ndërhyrje në zgjedhje.

Votimi u ripërsërit në maj të vitit 2025 dhe në fund u fitua nga presidenti i qendrës pro-evropiane, Nicusor Dan.

Georgescu, të cilit iu ndalua të kandidonte përsëri, por mbetet popullor, është tashmë në gjyq në dy raste të ndara, njëra me akuzën e përpjekjes për të prishur sigurinë kombëtare pas anulimit të zgjedhjeve, e dyta për promovimin e udhëheqësve fashistë të Rumanisë të viteve 1930, gjë që është e paligjshme. Ai ka mohuar të gjitha shkeljet.

Prokurorët bastisën shtëpinë e tij herët të hënën dhe e shoqëruan për t’u marrë në pyetje në një hetim të veçantë për mashtrim të dyshuar dhe ngritjen e një grupi të krimit të organizuar.

Prokurorët thanë se Georgescu dhe dy të dyshuar të tjerë e shtynë një biznesmen rumun nga qarku qendror i Buzaut t’u jepte atyre 1.1 milion euro duke e bërë të besonte se ata mund ta ndihmonin të merrte një linjë krediti deri në 15 milion euro nga një institucion financiar i huaj.

Prokurorët kanë thënë se disa hetime penale kanë zbuluar një model sulmesh hibride kundër Rumanisë që synojnë të ndikojnë te votuesit dhe të dobësojnë institucionet shtetërore. Fushata përfshinte sulme kibernetike, ngjarje publike dhe dezinformim online të lidhur me kanalet e propagandës pro-ruse.