Japonia dhe SHBA-ja bien darkort për hapa të mëtejshme kundër Koresë së Veriut
Kryeministri japonez, Shinzo Abe dhe presidenti i SHBA-së, Donald Trump ranë dakord gjatë një bisede telefonike se të dy vendet duhet të ndërmarrin hapa të mëtejshme për të trajtuar kërcënimet bërthamore dhe raketore të Koresë së Veriut pas nisjes së dytë të një rakete balistike ndërkontinentale (ICBM) të Phenianit.
Koreja e Veriut lëshoi raketën e dytë balistike ndërkontinentale të premten në mbrëmje , ndërkohë që ekspertët kanë paralajmëruar se qytetet amerikane janë tani brenda rrezes së raketave të Phenianit.
“Ne kemi bërë përpjekje të herëpashershme për të zgjidhur çështjen e Koresë së Veriut në mënyrë paqësore, duke negociuar me Shtetet e Bashkuara të Amerikës dhe me komunitetin ndërkombëtar, por Koreja e Veriut i ka shpërfillur të gjitha këto përpjekje duke përshkallëzuar më tej situatën e tensionuar”, tha kryeministri Abe.
“Kina, Rusia dhe pjesa tjetër e komunitetit ndërkombëtar duhet ta marrin seriozisht çështjen e Koresë së Veriut dhe të rrisin presionin ndaj saj”, shtoi ai.
Zëvendësshefi i kabinetit qeveritar, Koichi Hagiuda tha se Abe dhe Trump ranë dakord mbi rëndësinë e marrëdhënieve konstruktive ndërmjet Rusisë dhe Kinës për stabilitetin dhe sigurinë ndërkombëtare, për të ushtruar presion ndaj Phenianit që të heqë dorë nga programet e tij bërthamore dhe raketore.
Sipas kryeministrit Abe, Trump ka premtuar se do të marrë të gjitha masat e nevojshme për të mbrojtur Japoninë.
“Nën kohezionin e fortë midis Japonisë dhe Shteteve të Bashkuara, ne do të ndërmarrim veprime konkrete për të rritur aftësitë tona të mbrojtjes dhe sigurisë së qytetarëve ndaj kërcënimeve të vazhdueshme të Koresë së Veriut”, njoftoi Abe.
