Jet Ski hyn mes pushuesve në Karaburun, 500 mijë lekë gjobë për drejtuesin

Një mjet lundrues tip Jet Ski është bllokuar nga Policia Kufitare në Vlorë, pasi dyshohet se ka shkelur perimetrin e sigurisë në zonën e Karaburunit, duke rrezikuar jetën e pushuesve.

Ndërhyrja e policisë erdhi pas raportimeve dhe një videoje të dërguar nga qytetarët, ku shfaqej mjeti lundrues duke lëvizur pranë bregut, në kundërshtim me rregullat e sigurisë për zonat e frekuentuara nga pushuesit.

Mjeti Jet Ski u bllokua ndërsa drejtuesi i tij, shtetasi E. U., u ndëshkua me masë administrative në vlerën 500 mijë lekë.

“Menjëherë pas raportimeve dhe videos së dërguar nga qytetarët në Policinë e Shtetit, ku shfaqej një mjet lundrues tip Jet Ski që kishte hyrë në afërsi të bregut në zonën e Karaburunit, duke shkelur perimetrin e sigurisë dhe duke rrezikuar jetën e pushuesve, shërbimet e Policisë Kufitare të SPK Triport, në bashkëpunim me Njësinë Policore Detare, bënë të mundur konstatimin dhe ndalimin e mjetit lundrues, ndërsa po afrohej pranë molit të peshkimit në territorin e SPK Triport.

Mjeti lundrues Jet Ski u bllokua në pikën e bllokimit të mjeteve lundruese afër SMIL-it, ndërsa drejtuesi i mjetit, shtetasi E. U., u ndëshkua me masë administrative në vlerën 500.000 lekë të rinj.”, ka njoftuar Policia e Vlorës këtë të dielë, e cila më tej u ka bërë thirrje të gjithë drejtuesve të mjeteve lundruese të respektojnë perimetrin e sigurisë dhe rregullat e lundrimit, me qëllim garantimin e sigurisë së pushuesve përgjatë vijës bregdetare.

/tvklan.al