JORDANI – Forcat e mbrojtjes ajrore rrëzojnë tetë raketa iraniane

AMAN, 9 korrik /ATSH-DPA/ – Mbrojtja ajrore e Jordanisë rrëzoi tetë raketa të lëshuara nga Irani, në sulmin e parë të forcave iraniane pas disa javësh, njoftuan sot forcat e armatosura jordaneze.

Sipas autoriteteve ushtarake, mbetjet e raketave ranë në territorin e Jordanisë, por nuk u raportuan të lënduar apo dëme materiale.

Një zëdhënës i qeverisë jordaneze bëri të ditur se sirenat e alarmit u aktivizuan në të gjithë vendin pasi raketat hynë në hapësirën ajrore të Jordanisë.

Ndërkohë, ambasada e Shteteve të Bashkuara në Aman u bëri thirrje qytetarëve amerikanë të strehohen, të qëndrojnë brenda dhe të ndjekin paralajmërimet e autoriteteve lokale në të gjithë territorin e Jordanisë.

Më herët, përdorues të rrjeteve sociale raportuan për lëshimin e raketave nga disa provinca iraniane. Sipas këtyre raportimeve, raketa balistike u nisën nga zona pranë Urmias, në veriperëndim të Iranit, si dhe nga rajonet qendrore të vendit.

Incidenti vjen në një periudhë tensionesh të larta në Lindjen e Mesme, ku Jordania është përballur disa herë me rrezikun e raketave dhe dronëve që kalojnë mbi territorin e saj për shkak të përshkallëzimit të konfliktit rajonal.

Autoritetet jordaneze theksuan se forcat e mbrojtjes ajrore mbeten në gatishmëri të plotë për të mbrojtur sovranitetin e vendit dhe sigurinë e qytetarëve, ndërsa vijojnë monitorimin e situatës në bashkëpunim me partnerët ndërkombëtarë./  /Ad.Ab./ a.jor.