Justin Timberlake zbulon prapaskenat e jetës së tij, nga Janet Jackson te Britney Spears

Justin Timberlake duket se është gati të rikthejë në vëmendje një nga momentet më të përfolura të karrierës së tij.

Këngëtari po përgatit një dokumentar me disa episode, ku pritet të trajtohen disa prej polemikave më të mëdha që kanë shoqëruar jetën e tij publike, përfshirë incidentin famëkeq me Janet Jackson gjatë spektaklit të Super Bowl-it në vitin 2004.

Sipas burimeve të cituara nga Variety, projekti do të përbëhet nga katër episode dhe pritet të publikohet në platformën Apple TV në muajin dhjetor.

Dokumentari, i cili përshkruhet si një rrëfim i hapur mbi jetën dhe karrierën e këngëtarit, do të drejtohet nga Fisher Stevens.

Një prej pjesëve më të rëndësishme të tij pritet të jetë intervista me Janet Jackson, e cila do të rikthehet te ngjarja që shkaktoi një debat të madh në Shtetet e Bashkuara dhe më gjerë.

Gjatë performancës në pushimin e ndeshjes së Super Bowl XXXVIII, në vitin 2004, Timberlake tërhoqi një pjesë të veshjes së Jackson, duke ekspozuar gjoksin e këngëtares përpara miliona teleshikuesve. Incidenti u cilësua në atë kohë si një problem me kostumin, por pasojat për dy artistët ishin dukshëm të ndryshme.

Ngjarja shkaktoi më shumë se gjysmë milioni ankesa dhe nxiti një hetim nga Komisioni Federal i Komunikimeve në SHBA.

Janet Jackson u përball me kritika të ashpra dhe pasoja në karrierën e saj, ndërsa Timberlake u kritikua më vonë për mënyrën se si reagoi ndaj situatës.

Në vitin 2021, këngëtari publikoi një ndjesë publike për Janet Jackson dhe ish-partneren e tij, Britney Spears, duke pranuar se kishte përfituar nga një sistem që toleronte mizogjininë dhe racizmin.

Ndërkohë, dokumentari nuk do të ndalet vetëm te incidenti i Super Bowl-it. Sipas raportimit, Timberlake pritet të trajtojë edhe disa prej komenteve të fundit të Britney Spears për marrëdhënien e tyre të dikurshme.

Jackson dhe Timberlake kanë folur edhe më parë për ngjarjen. Në dokumentarin e saj të publikuar në vitin 2022, këngëtarja deklaroi se incidenti ishte një aksident që ishte ekzagjeruar së tepërmi, duke theksuar se ajo dhe Timberlake kishin ruajtur miqësinë.

Deri më tani, nuk janë bërë të ditura detaje të tjera mbi titullin apo datën e saktë të publikimit të dokumentarit.