“Ka pasur vonesa, por do të përfundojë në vitin 2027”, Karakaçi flet për hekurudhën Tiranë-Durrës

Në një konferencë për gazetarët, ministri i Infrastrukturës dhe Energjisë Enea Karakaçi foli edhe për hekurudhën Tiranë-Durrës.

Ministri theksoi se ka pasur vonesa për sa i përket këtij projekti, por vlerësoi se deri në vitin 2027 ky projekt do të jetë i përfunduar, duke u bërë edhe vija e parë hekurudhore funksionale në Shqipëri.

“Përsa i përket vënies në punë të hekurudhës Tiranë-Durrës, vepra për bërjen e shinave kryesore është përfunduar. Ai është një projekt në ndërtim dhe zhvillim. Patjetër ka pasur vonesa përkatëse sepse projekti i hekurudhës, kur është marrë kredia e parë, ka qenë i paplotë, nuk ka qenë në fazën e elektrifikimit dhe nuk kishte stacionet përkatëse, të cilat tashmë janë ezauruar.

Ne kemi edhe procedurë prokurimi sa i përket elektrifikimit, që është faza përmbyllëse e kësaj procedure hekurudhore.

Elementi i rëndësishëm është se Hekurudha Shqiptare e ka maturuar projektin me Bankën Evropiane për Rindërtim dhe Zhvillim dhe ka vendosur, sepse pika shqetësuese e hekurudhës ishte në Kashar, dhe tashmë Hekurudha Shqiptare ka filluar procedurat e rikthimit për të përmbyllur edhe katër kilometrat e fundit të hekurudhës Tiranë-Durrës, në pikën ku ka qenë gjithmonë stacioni i trenit në Tiranë. Edhe kjo procedurë është nisur dhe është publikuar.

Vlerësoj që në vitin 2027 është i realizueshëm, vija e parë hekurudhore funksionale në Shqipëri”, u shpreh ai.