Kadastra pajis me dokument pronësie 326 kulla në veri, Goxhobelli: 371 të tjera në proces
Drejtoresha e Kadastrës, Lorena Goxhobelli, gjatë vizitës në Shulbater të Klosit tha se në shtatë muaj ka nisur puna për 697 kulla në katër qarqe të veriut.
Drejtoresha e Përgjithshme e Agjencisë Shtetërore të Kadastrës, Lorena Goxhobelli, zhvilloi një vizitë në Shulbater, në Klos të Dibrës, ku u takua me familjet përfituese të Programit të Rijetëzimit të Kullave të Veriut dhe ndoqi ecurinë e pajisjes së tyre me dokumentacion pronësie, siç njofton Shqiptarja.com.
Goxhobelli theksoi se pajisja e familjeve me dokumentet e pronësisë është hap thelbësor për restaurimin e kullave, nxitjen e investimeve dhe ruajtjen e trashëgimisë kulturore të zonës.
Sipas saj, në vetëm shtatë muaj ka nisur puna për 697 kulla në katër qarqe të veriut: Shkodër, Lezhë, Dibër dhe Kukës; prej tyre 326 janë pajisur tashmë me tituj pronësie, ndërsa për 371 të tjerat puna vazhdon.
Programi për Rijetëzimin e Kullave të Veriut realizohet me ndihmën e GIZ dhe Ministrisë së Turizmit, Kulturës dhe Sportit.
Pajisja me dokumentacion pronësie ndihmon zgjidhjen e problematikave të pronësisë dhe kthen kullat në pasuri që u shërbejnë familjeve dhe zhvillimit të turizmit në zonat ku ndodhen.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.