Kanadaja dhe Ontario shpallin paketë prej 9 miliardë dollarësh kanadezë për çelikun dhe automjetet përballë tarifave amerikane

Kanadaja dhe provinca e Ontarios shpallën të mërkurën një paketë mbështetjeje prej 9 miliardë dollarësh kanadezë (rreth 6,4 miliardë dollarë amerikanë) për të ndihmuar sektorët e çelikut dhe të automjeteve të përballojnë tarifat amerikane dhe për të forcuar zinxhirët e furnizimit me minerale kritike, siç njofton Reuters.

Kryeministri Mark Carney e prezantoi planin në Otavë, përkrah kryeministrit të Ontarios, Doug Ford. “Tarifat amerikane kanë përmbysur një marrëveshje tregtare që ka ekzistuar prej dekadash”, tha Carney gjatë prezantimit, të cilin e citojnë mediat kanadeze dhe ndërkombëtare.

Pjesa më e madhe e paketës, mbi 5 miliardë dollarë kanadezë, shkon për një fond të përbashkët veprimi për çelikun, me angazhime pesëvjeçare prej 3,55 miliardë dollarësh nga qeveria federale dhe 1,67 miliardë nga Ontario. Fondi do t’i ndihmojë fabrikat të modernizojnë makineritë, të diversifikojnë prodhimin dhe të hyjnë në tregje të reja jashtë SHBA-së, ndërsa politikat “Buy Canadian” dhe “Buy Ontario” do t’i japin përparësi çelikut vendas në prokurimet publike.

Për sektorin e automjeteve janë parashikuar 2,5 miliardë dollarë kanadezë gjatë dy viteve të ardhshme — 1,5 miliardë nga Otava dhe 1 miliard nga Ontario — për projekte kapitale dhe për prodhimin e automjeteve elektrike dhe të lidhura. Njëkohësisht, standartet federale të emetimeve për automjetet e reja do të mbeten në nivelet e vitit 2026 deri në vitin model 2029, për t’u dhënë prodhuesve më shumë fleksibilitet përballë presioneve tregtare.

Otava do të shpenzojë edhe 1 miliard dollarë kanadezë për ndërtimin e rrugëve drejt rajonit të largët “Ring of Fire” në Ontario, një zonë e pasur me minerale kritike, zhvillimi i së cilës konsiderohet strategjik për zinxhirët e furnizimit të Amerikës së Veriut.

Paketa është masa më e fundit në një seri hapash të qeverisë kanadeze për sektorët më të goditur nga tarifat. Përpara mandatit të dytë të presidentit Donald Trump, Kanadaja ishte furnizuesi më i madh i huaj i çelikut dhe aluminit për SHBA-në; bisedimet për lehtësim tarifor me Uashingtonin dështuan në gusht, duke i përkeqësuar më tej marrëdhëniet tregtare mes dy ekonomive të lidhura ngushtë.