Katari njofton takim sot me Iranin për ndërmjetësim: synohet afrimi i qëndrimeve për dosjen bërthamore dhe tensionet me SHBA-në
Doha thotë se përpjekjet ndërmjetësuese për zgjidhjen e konfliktit SHBA–Iran vazhdojnë dhe se takimi i sotëm me palën iraniane synon shkëmbimin e pikëpamjeve për dosjen bërthamore iraniane dhe tensionet Uashington–Teheran.
Katari ka njoftuar se sot do të zhvillojë një takim me palën iraniane, si pjesë e përpjekjeve ndërmjetësuese për zgjidhjen e konfliktit mes Shteteve të Bashkuara dhe Iranit. “Takimi i sotëm me palën iraniane do të zhvillohet si pjesë e përpjekjeve ndërmjetësuese dhe e shkëmbimit të pikëpamjeve për të arritur një zgjidhje për dosjen bërthamore iraniane dhe tensionet SHBA–Iran”, deklaroi zëdhënësi i Ministrisë së Jashtme të Katarit, Majed al-Ansari, në konferencën javore për shtyp, siç njofton Al Jazeera.
Sipas Dohas, takimi synon të afrojë qëndrimet e palëve, ndërsa al-Ansari u bëri thirrje Uashingtonit dhe Teheranit të arrijnë një marrëveshje. Katari është prej muajsh një nga ndërmjetësuesit kryesorë në krizën që shpërtheu pas sulmeve amerikano-izraelite ndaj Iranit, së bashku me Omanin dhe Pakistanin.
Njoftimi vjen në një ditë tensioni të lartë në rajon: në Ngushticën e Hormuzit vazhdojnë incidentet ndaj cisternave, ndërsa Uashingtoni mban bllokadën detare ndaj Iranit dhe Teherani paralajmëron përgjigje ndaj çdo përshkallëzimi. Deri tani, përpjekjet diplomatike nuk kanë prodhuar një marrëveshje për ri-hapjen e plotë të ngushticës dhe uljen e tensioneve.



Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.