Kazino në Kërçovë vidhte rrymë me pajisje nga tregu i zi, dëmi mbi 2,7 milionë denarë

Një kazino në rrugën “Magjistralja” në Kërçovë përdorte në mënyrë të paautorizuar energji elektrike, me një pajisje nga tregu i zi që manipulonte njehsorët, siç njofton Fokus, duke iu referuar njoftimit të mëngjesit të sotëm të Elektrodistribucionit.

Sipas Elektrodistribucionit, pas analizave të hollësishme të konsumit dhe ndjekjes së vazhdueshme të dinamikës së përdorimit të energjisë, ekipi i specializuar për zbulimin e përdorimit të paautorizuar të energjisë elektrike kreu një kontroll në terren në kazino dhe konstatoi sjellje jotipike të pajisjeve matëse, të shoqëruar me një zhurmë jonormale në kabinetin e matjes.

“Me matjet e kryera u regjistrua një frekuencë prej 225 deri në 340 Hz, që është një devijim i ndjeshëm nga standardi prej 50 Hz. Është përdorur një pajisje për manipulimin e frekuencave, e siguruar në tregun e zi, me të cilën ndikohej mbi dy njehsorë dhe mundësohej mosregjistrimi i pjesshëm ose i plotë i energjisë reale të konsumuar”, shpjegojnë nga Elektrodistribucioni, siç përcjell Fokus.

Nga kompania theksuan se është hartuar procesverbal për përdorim të paautorizuar dhe është dorëzuar kallëzim në Ministrinë e Punëve të Brendshme për marrje të paautorizuar të energjisë elektrike.

Janë përgatitur edhe dy fatura të veçanta për dëmshpërblim, për të dyja vendet e matjes, në shumë të përgjithshme prej 2.722.798 denarësh, që kazinoja duhet t’i paguajë.